तलाठी परीक्षेत उत्तीर्ण करुन नोकरीचे आमिष, सुशिक्षित बेरोजगारांना लाखोंचा गंडा घालणारा सरकारी कर्मचारी गजाआड...

महाराष्ट्र,नाशिक : बागलाण तालुक्यातील सुशिक्षित बेरोजगारांना नोकरी लावून देण्याचे आमिष दाखवून ५० लाखांहून अधिक माया जमा करून गेल्या दोन वर्षांपासून पोलिसांना चकवा देणाऱ्या तरुणास सटाणा पोलिसांनी छत्रपती संभाजीनगरमधील सिल्लोड येथून शिताफीने अटक केली. प्रतीक मदन पाठक असे संशयिताचे नाव असून, त्यास सटाणा न्यायालयाने चार दिवसांची पोलिस कोठडी सुनावली आहे.

सन २०२३ मध्ये तलाठी परीक्षेत पाल्यांना उत्तीर्ण करण्याची व त्यांना नोकरीचे आदेश काढून देण्याची जबाबदारी माझी, अशी बतावणी करीत सटाणा येथील रहिवासी व आदिवासी विकास विभागात नोकरीला असलेला प्रतीक पाठक याने शहरासह तालुक्यातील अनेक सुशिक्षित पदवीधरांकडून लाखो रुपयांची माया गोळा केली होती. परीक्षा झाल्यानंतर पाठक याने सांगितल्याप्रमाणे पैसे दिलेल्या उमेदवारांनी उत्तरपत्रिका न सोडवता पेपर कोरे दिले. वेळेत निकाल जाहीर झाल्यावर ज्या उमेदवारांकडून पाठक याने लाखो रुपये जमा केले होते, त्यांची नावे न आल्याने ते उमेदवार व पालकांनी पाठककडे विचारणा केली असता, त्याच्याकडून उडवाउडवीची उत्तरे मिळाली.

सहा महिने उलटूनही अंतिम यादी न लागल्याने फसवणूक झाल्याचे लक्षात आल्यानंतर फसवणूक झालेले पालक पंचायत समितीचे माजी सभापती परशुराम आहिरे यांच्यासह नरेंद्र निंबा भामरे (लखमापूर), संतोष पोपट निकम (पांढरूण), तुकाराम पुंडलिक शेवाळे (चौगाव), राजेंद्र रामचंद्र खैरनार (सातपूर, नाशिक) यांनी सटाणा पोलिसांत धाव घेऊन प्रतीक मदन पाठकच्या खात्यावर आरटीजीएससह धनादेश व रोख स्वरूपात नोकरीसाठी ५० लाखांहून अधिक रकम दिल्याचे व त्यातून फसवणूक झाल्याचे सांगून पाठकविरोधात तक्रार दाखल केली होती. त्यानुसार सटाणा पोलिसांनी फसवणुकीचा गुन्हा दाखल केला होता.

पोलिसांनी ई-कॉमर्स कंपन्याच्या प्रतिनिधींच्या मदतीने पाठकचा शोध घेतला असता तो, छत्रपती संभाजीनगर जिल्ह्यातील सिल्लोड शहरात असल्याची माहिती मिळाल्याने पोलिस निरीक्षक बाजीराव पोवार यांनी सापळा रचून त्यास अटक केली. त्यास सटाणा न्यायालयासमोर उभे केले असता, न्यायालयाने त्यास चार दिवसांची पोलिस कोठडी सुनावली. पोवार यांच्या मार्गदर्शनाखाली उपनिरीक्षक दत्तात्रेय राऊत, एन. बी. जगताप, वाय. के. शेवाळे, बी. ए. सूर्यवंशी, आर. एम. शिंदे, एस. बी. कदम यांच्या पथकाने अटकेची कारवाई केली. दरम्यान, पाठक हा सटाण्यातील एका राजकीय नेत्याचा कार्यकर्ता असल्याची चर्चा आहे.