वाहनधारकांनो खबरदारी घ्या! 'एचएसआरपी' तयार करण्याच्या प्रक्रियेत सायबर चोरांचीही तयारी...

महाराष्ट्र ,छत्रपती संभाजीनगर : जुन्या वाहनांवर एचएचआरपी बसविण्यासाठी सायबर गुन्हेगारांनी बनावट लिंक, साइटस तयार केली आहे. त्याच्याविरोधात परिवहन विभागाने गुन्हा दाखल केला आहे. त्यामुळे जुन्या वाहनांवर उच्च सुरक्षा नोंदणी क्रमांक पाटी बसविण्यासाठी इतर कोणत्याही बनावट साइट लिंकचा वापर करू नये. याची खबरदारी वाहनधारकांनी घ्यावी असे आवाहन परिवहन विभागाकडून करण्यात आले आहे.

जुन्या वाहनांना नवीन उच्च सुरक्षा नोंदणी क्रमांक पाटी (एचएसआरपी) बसविण्यासाठी परिवहन विभागाने संस्थेची नियुक्त केली आहे. 'एचएसआरपी' तयार करण्याच्या प्रक्रियेत सायबर चोरांनीही तयारी सुरू केली आहे. बनावट साइट तयार करून सर्वसामान्य नागरिकांकडून नंबर प्लेट बुकींगसाठी रक्कम जमा करून फसवणूक केली जात असल्याची माहिती आरटीओ विभागाकडून देण्यात आली आहे.

वर्ष २०१९ च्या पुर्वी असलेल्या वाहनांना हायसेक्युरिटी नंबर प्लेट बसविण्याबाबत शासनाने आदेश लागू केले आहेत. ३१ मार्च पर्यंत नंबर प्लेट बसविण्याची मुदत देण्यात आली आहे. परिवहन विभागाने एचएसआरपी नंबर प्लेट बसविण्यासाठी एजन्सी नियुक्त करण्यात आली आहे. ही नंबर प्लेट तयार करण्यासाठी संबंधीत वाहन मालकांनी वाहनांवर उच्च सुरक्षा नोंदणी क्रमांक (एचएसआरपी) पाटी बसविण्यासाठी केवळ परिवहन विभागाच्या https://transport.maharashtra.gov.in या संकेतस्थळावर भेट देऊन एचएसआरपी ऑनलाइन बुकींग या लिंकवर क्लिक करून हायसेक्युरिटी नंबर प्लेट बसविण्याबाबत कारवाई पूर्ण करण्याबाबत सूचना करण्यात आलेली आहे. विविध राज्यांमध्ये विविध वेबसाइट तयार करून, त्यावरून हायसेक्युरिटी नंबर प्लेट तयार करण्याची प्रक्रिया सुरू करण्यात आलेली आहे.

एचएसआरपी नंबर प्लेट प्रकरणात आता सायबर चोर फसवणूक करण्याचा प्रयत्न करीत आहेत. काही राज्यांमध्ये सायबर चोरांनी एचएचआरपीसाठी हुबेहूब शासनाने तयार केलेली साइट तयार केली आहे. या साइटवर माहिती भरल्यानंतर, एचएसआरपीसाठी पैसे घेण्यात येत आहेत. या बनावट वेबसाइटवर ऑनलाइन पैसे टाकल्यानंतर ऑर्डर बुक झाल्याची माहितीही मिळत आहे. अशा बनावट वेबसाइटचा सर्वसामान्य नागरिकांना फटका बसत आहे. याशिवाय या साइटवर अधिक फसवणूक होण्याचीही शक्यता वर्तविण्यात येत आहे. दरम्यान, नंबर प्लेट प्रकरणात आता सायबर चोर फसवणूक करण्याचा प्रयत्न करीत असल्याने ग्राहकांनी, वाहनमालकांनी त्याचप्रमाणे अधिकाऱ्यांनीही सावध राहण्याची गरज आहे. याबाबत पोलिसांच्या सायबर गुन्हे शाखेकडे तात्काळ माहिती द्यावी, असे आवाहन पोलिसांनीही केले आहे.