रायगडात तुतारीने रणशिंग फुंकले! श्रीवर्धन-म्हसळा, माणगाव, रोहा, तळा तालुक्यांमध्ये राष्ट्रवादी काँग्रेस (शरदचंद्र पवार) पक्षाची जोरदार तयारी; ६०% नव्या चेहऱ्यांना संधी..

श्रीवर्धन: आगामी पंचायत समिती आणि जिल्हा परिषद निवडणुकांसाठी राष्ट्रवादी काँग्रेस पार्टी - शरदचंद्र पवार पक्षाने श्रीवर्धन विधानसभा मतदारसंघातून रणशिंग फुंकले आहे. विधानसभा अध्यक्ष श्री. अझहर धनसे यांनी प्रसारमाध्यमांशी बोलताना पक्षाची जोरदार तयारी आणि नव्या नेतृत्वाला संधी देण्याची भूमिका स्पष्ट केली आहे. त्यांच्या या वक्तव्यामुळे महायुतीच्या गोटात मोठी खळबळ उडण्याची शक्यता आहे.

श्रीवर्धन विधानसभा अध्यक्ष श्री. अझहर धनसे यांच्या अध्यक्षतेखाली झालेल्या बैठकीत आगामी पंचायत समिती आणि जिल्हा परिषद निवडणुकांमध्ये श्रीवर्धन, म्हसळा, माणगाव, रोहा, तळा या तालुक्यांवर 'तुतारीचा' (राष्ट्रवादी काँग्रेस (शरदचंद्र पवार)) झेंडा फडकवण्याचा निर्धार व्यक्त करण्यात आला आहे.

श्री. अझहर धनसे यांनी जाहीर केले की, आगामी निवडणुकीत पक्षाकडून उमेदवारी देताना मोठी फेरबदल करण्यात येणार आहे.

​६०% उमेदवारी नवीन, तरुण आणि उत्साही चेहऱ्यांना देण्यात येणार आहे.

​२०% उमेदवारी आजी-माजी सदस्यांना (ज्यांनी पक्षासाठी निष्ठा जपली) मिळणार आहे.

​उर्वरित २०% उमेदवारी महायुतीसह इतर सत्ताधारी पक्षांतून राष्ट्रवादी काँग्रेस (शरदचंद्र पवार) पक्षात प्रवेश करणाऱ्या दमदार उमेदवारांना दिली जाईल.

​या '६०-२०-२०' फॉर्मुल्यामुळे सर्वसामान्य कार्यकर्ते आणि तरुण नेत्यांना मोठी संधी मिळणार असून, सत्ताधारी पक्षातून योग्य उमेदवारांचे पक्षांतर करण्याची पक्षाची रणनीती स्पष्ट झाली आहे.

श्री. धनसे पुढे म्हणाले की, "महायुतीच्या सत्ताकाळात श्रीवर्धन विधानसभा क्षेत्रातील नागरिकांचे प्रश्न तसेच आहेत. महागाई, बेरोजगारी आणि स्थानिक पातळीवरील समस्यांबाबत जनतेमध्ये तीव्र नाराजी आहे. या नाराजीला सकारात्मकतेत बदलून आम्ही पूर्ण तयारी केली आहे."

राष्ट्रवादी काँग्रेस पार्टी - शरदचंद्र पवार पक्षाने श्रीवर्धन विधानसभा क्षेत्रातील पाच (श्रीवर्धन, म्हसळा, माणगाव, रोहा, तळा) तालुक्यांमध्ये जिल्हा परिषदेच्या १४ जागा आणि पंचायत समितीच्या २८ जागा लढवण्याची पूर्ण तयारी ठेवली आहे.

​आघाडी झाली तरी ठीक, नसली तरी 'तुतारी' एकट्याने वाजेल:

श्री. धनसे यांनी स्पष्ट केले, "आम्ही वरिष्ठांच्या आदेशाची वाट पाहत आहोत. आघाडी झाली, तर आम्ही एकत्रपणे सामोरे जाऊ. परंतु, जर काही कारणास्तव आघाडी झाली नाही, तरीही राष्ट्रवादी काँग्रेस पार्टी - शरदचंद्र पवार पक्ष स्वबळावर पाचही तालुक्यांमध्ये जिल्हा परिषदेचे १४ आणि पंचायत समितीचे २८ उमेदवार उभे करून महायुतीला जोरदार टक्कर देईल. आमची तयारी अभेद्य आहे."

​श्री. अझहर धनसे यांच्या या स्पष्ट आणि आक्रमक भूमिकेमुळे विरोधी पक्षांमध्ये (महायुतीमध्ये) उमेदवारीच्या वाटपापासून ते निवडणुकीच्या रणनीतीपर्यंत आतापासूनच धाकधूक वाढली असल्याची चर्चा राजकीय वर्तुळात सुरू झाली आहे.