म्हसळा शहराच्या विकासाला नवी गती; नगरपंचायतीच्या नवीन प्रशासकीय इमारतीची स्थळ पाहणी संपन्न...

म्हसळा (प्रतिनिधी): म्हसळा शहराच्या वैभवात भर टाकणाऱ्या नगरपंचायत प्रशासनाच्या नवीन शासकीय इमारतीचे काम आता प्रगतीपथावर आहे. शुक्रवार, १९ डिसेंबर २०२५ रोजी म्हसळा-सावर येथे या नियोजित इमारतीच्या जागेची सविस्तर स्थळ पाहणी करण्यात आली. यावेळी म्हसळा शहराच्या प्रथम नागरिक नगराध्यक्षा श्रीमती फरीन अब्दुल अजीज बशारत यांच्यासह शिवसेना (शिंदे गट) पक्षाचे सर्व नगरसेवक उपस्थित होते.

भरतशेठ गोगावले यांच्या नेतृत्वावर विश्वास...

काही काळापूर्वी म्हसळा नगरपंचायतीवर राष्ट्रवादी काँग्रेस (अजित पवार गट) पक्षाची एकहाती सत्ता होती. मात्र, शहराच्या विकासासाठी आणि माननीय नामदार श्री. भरतशेठ गोगावले यांच्या नेतृत्वावर विश्वास ठेवून नगराध्यक्षांसह ९ नगरसेवकांनी शिवसेना (शिंदे गट) पक्षात जाहीर प्रवेश केला होता. या परिवर्तनानंतर आता नगरपंचायतीवर शिवसेनेचा भगवा फडकत असून, गोगावले यांच्या मार्गदर्शनाखाली शहराच्या विकासाने वेग घेतला आहे.

 नियोजित इमारतीमुळे कामात सुसूत्रता येईल.... 

नगराध्यक्षा फरीन बशारत यांनी यावेळी बोलताना सांगितले की, "नगरपंचायतीच्या नवीन इमारतीमुळे प्रशासकीय कामात सुसूत्रता येईल आणि नागरिकांना एकाच छताखाली सर्व सुविधा मिळतील. आम्ही सर्व नगरसेवक एक टीम म्हणून शहराच्या सर्वांगीण विकासासाठी कटिबद्ध आहोत."

मूलभूत सुविधांना प्राधान्य: नगरसेवक आसल कादरी...

याप्रसंगी नगरसेवक श्री. आसल कादरी यांनी आपल्या भावना व्यक्त करताना सांगितले की, "नामदार भरतशेठ गोगावले यांच्याकडे विकासाची दूरदृष्टी आहे. त्यांच्या मार्गदर्शनामुळेच आज म्हसळा शहरात मोठ्या प्रमाणावर विकासकामे सुरू झाली आहेत. येणाऱ्या काळात शहरवासीयांना कोणत्याही मूलभूत सोयी-सुविधांची कमतरता भासणार नाही, याची ग्वाही आम्ही देतो."

- म्हसळा नगरपंचायतीवर आता शिवसेना (शिंदे गट) पक्षाचे एकहाती वर्चस्व.

 - नगराध्यक्षांसह सर्व नगरसेवक विकासाच्या मुद्द्यावर एकत्र.

या स्थळ पाहणीवेळी शिवसेनेचे पदाधिकारी, नगरसेवक आणि नगरपंचायत प्रशासनाचे अधिकारी मोठ्या संख्येने उपस्थित होते.