भाजपचा बॉस कोण? फडणवीस, तावडेंनंतर दिग्गजाचं नाव चर्चेत; शहांचे खास, महाराष्ट्राशी कनेक्शन...

नवी दिल्ली: लोकसभा निवडणुकीत अपेक्षित यश न मिळाल्यानं बहुमतापासून दूर राहिलेल्या भारतीय जनता पक्षात लवकरच संघटनात्मक पातळीवर मोठे बदल होणार आहेत. जम्मू-काश्मीर आणि हरयाणा विधानसभा निवडणुकीच्या निकालानंतर पक्षात आणि सरकारमध्ये मोठे बदल होऊ शकतात. महाराष्ट्र भाजपमधील एका बड्या नेत्याला केंद्रीय कॅबिनेटमध्ये वरिष्ठ पदावर किंवा पक्ष संघटनेत वरिष्ठ पातळीवर संधी मिळू शकते.

नरेंद्र मोदी तिसऱ्यांदा पंतप्रधान झाल्यानंतर मंत्रिमंडळ स्थापन झालं. मंत्रिमंडळाचा विस्तार न झाल्यानं अनेक मंत्र्यांकडे अतिरिक्त मंत्रालयांची जबाबदारी आहे. त्यांच्याकडे असलेला अतिरिक्त प्रभार कमी करायचा असल्यास मंत्रिमंडळ विस्तार गरजेचा आहे. केंद्रीय मंत्रिमंडळात महत्त्वाची खाती हाताळण्यासाठी प्रशासनाचा चांगला अनुभव असलेल्या व्यक्तींची गरज आहे. फडणवीस यांनी मुख्यमंत्री, उपमुख्यमंत्री, गृह मंत्रालयाची जबाबदारी हाताळलेली आहे. त्यामुळे प्रशासकीय कामाचा दांडगा अनुभव त्यांना आहे. त्यामुळे त्यांना केंद्रात संधी मिळण्याची जास्त शक्यता आहे.

द न्यू इंडियन एक्सप्रेसनं सुत्रांच्या हवाल्यानं दिलेल्या माहितीनुसार, केंद्रीय मंत्रिमंडळात काम केलेल्या नेत्याला भाजपच्या अध्यक्षपदी संधी मिळू शकते. 'भाजपनं सध्या सदस्यत्व नोंदणी सुरु केली आहे. त्याचा पहिला टप्पा २५ सप्टेंबरला पूर्ण झाला. नोंदणी अभियानाचा दुसरा टप्पा ऑक्टोबरमध्ये सुरु होईल. या अभियानाच्या प्रतिसादावरुन भाजपचा पुढील अध्यक्ष ठरेल,' अशी माहिती भाजपमधील सुत्रांनी दिली.

पक्षाच्या अध्यक्षपदासाठी तीन ते चार प्रमख नावांची चर्चा आहे. नोव्हेंबरमध्ये यासाठीची निवड प्रक्रिया पार पडेल, असं वरिष्ठ पदाधिकाऱ्यानं सांगितलं. 'विनोद तावडेंकडे सदस्यत्व अभियानाची जबाबदारी आहे. ते बिहारचेही प्रभारी आहेत. संघटनात्मक कौशल्यासाठी ते ओळखले जातात. त्यामुळे फडणवीस यांच्यासोबतच त्यांच्या नावाचा विचारदेखील अध्यक्षपदासाठी सुरु आहे,' अशी माहिती पक्षातील सुत्रांनी दिली.

भूपेंद्र यादव यांच्या नावाचीही भाजप अध्यक्ष पदासाठी चर्चा आहे. त्यांच्याकडे महाराष्ट्राचा प्रभार आहे. निवडणूक बैठकांचा सपाटा त्यांनी लावलेला आहे. याशिवाय ते केंद्रीय गृहमंत्री अमित शहांच्या जवळचे मानले जातात. त्यांच्याकडे चांगला संघटनात्मक अनुभव आहे. त्यामुळेच त्यांच्याकडे महाराष्ट्रासारख्या महत्त्वाच्या राज्याची जबाबदारी देण्यात आली आहे.